അടിയന്തരയോഗം
സര്,നമ്മളെന്തൊക്കെയാണ് ചെയ്യേണ്ടത് ?
അതെ ,അതാണ് ആദ്യം ആലോചിക്കേണ്ടത്. ചായ അതു കഴിഞ്ഞിട്ടാവാം അല്ലേ ?
അതെ സര്, ചായ അതു കഴിഞ്ഞു മതി..
ശരി ഇപ്പോ എന്താണ് സ്ഥിതി ?
തീവ്രവാദി ആക്രമണം ആവാനാണ് സാധ്യത…
പിന്നല്ലാതെ.. നമ്മളിതെത്ര കണ്ടതാ.. എന്നിട്ട് ? അവന്മാര് പൊട്ടിച്ചു കഴിഞ്ഞോ ?
കഴിഞ്ഞെന്നു തോന്നുന്നു സര്… മൂന്നിടത്ത് പൊട്ടി… പിന്നെ കേട്ടില്ല…
മീഡിയ സര്ക്കാരിനെ കുറ്റപ്പെടുത്തുന്നില്ലല്ലോ, ഉണ്ടോ ?
ആ ഒരു സ്റ്റേജിലേക്ക് എത്തിയിട്ടില്ല…അവന്മാര് കണക്കെടുക്കുന്നതേയുള്ളൂ..പരമാവധി മരണസംഖ്യ കൊടുക്കാനുള്ള ലേലം വിളിയാ…25 എത്തി നില്ക്കുന്നു…
ശരിക്കും എത്രയായി ?
പെറുക്കിക്കൂട്ടി എണ്ണാന് തുടങ്ങുന്നതേയുള്ളൂ..
പത്രക്കാരെ സൂക്ഷിക്കണം.. സുരക്ഷാവീഴ്ചയെന്നൊക്കെ പറഞ്ഞ് ആരെങ്കിലും എളക്കിവിട്ടാല് വെറുതെ ജോലിയാകും…
പെട്ടെന്നിപ്പോ എന്തൊക്കെയാണ് ചെയ്യേണ്ടത് സര് ?
താനെന്താടോ ഇങ്ങനെ വിയര്ക്കുന്നേ ? ഇതിപ്പോ എത്രാമത്തെ തവണയാ ബോംബ് സ്ഫോടനം മാനേജ് ചെയ്യുന്നത്… പതിവ് നടപടിക്രമങ്ങള് തന്നെ പാലിച്ചാല് മതി… ആദ്യം ഒരു തീവ്രവാദി സംഘടനയുടെ പേര് പറയുക, പിന്നെ മരിച്ചവരുടെ എണ്ണം, പിന്നെ ആയുധത്തിന്റെ സ്വഭാവം… തല്ക്കാലം ഇത്രേം പറഞ്ഞ് കൊട്… മീഡിയ അത് വച്ച് തകര്ത്തോളും..അത് കഴിയുമ്പോഴേക്കും പിഎം ഞെട്ടല് പ്രകടിപ്പിച്ചോളും…ഞാനും പ്രകടിപ്പിച്ചേക്കാം…
സര്, പാക്കിസ്ഥാനാണ് ഇതിന്റെ പിന്നിലെന്നും പറയില്ലേ ?
ഹ, അത് പിന്നെ എപ്പോഴും പറയുന്നതല്ലേ… പത്രക്കുറിപ്പിനുള്ള ലെറ്റര് പാഡ് അച്ചടിച്ചപ്പോള് തന്നെ അതും ചേര്ത്തിട്ടുണ്ട്.. ബാക്കിയുള്ളത് അടിച്ചു ചേര്ത്താല് മതി…
ശരി സര്…ഏത് സംഘടനയുടെ പേരാണ് പറയേണ്ടത് സര് ?
ഏതെങ്കിലും പറഞ്ഞോ… അതൊക്കെ മീഡിയയില് വന്നു കഴിയുമ്പോ ശരിക്കും പൊട്ടിച്ചവന് സഹിക്കില്ല, അവനപ്പോ തന്നെ ഒരു ഇമെയിലയക്കും.. അപ്പോ നമുക്കവന്റെ പേര് പറയാം.. ഈ ടെററിസ്റ്റുകള്ക്കും ഭയങ്കര മീഡിയ ക്രെയ്സാ…അല്ലാ..തീവ്രവാദികളില് ആരെയും പിടിച്ചിട്ടില്ലല്ലോ അല്ലേ ?
ഇല്ല സര്.. ഇല്ല…
ഹൊ നന്നായി… കഴിഞ്ഞ വര്ഷം ഒരുത്തനെ പിടിച്ചേന്റെ പൊല്ലാപ്പ് ഇതുവരെ തീര്ന്നിട്ടില്ല…എത്രയാ അവനെ സംരക്ഷിക്കാന് ചിലവാകുന്നത്.. ആരേം പിടിക്കേണ്ട.. വരുന്നവന്മാര് പൊട്ടിച്ചിട്ടങ്ങ് പൊക്കോട്ടെ.. ഇത്രേം ജനസംഖ്യയുള്ളതല്ലേ…
ഇല്ല സര്, ഞങ്ങളായിട്ട് ആരേം പിടിക്കില്ല.. ഇനി അവരായിട്ട് ആയുധം വച്ച് കീഴടങ്ങാനോ മറ്റോ വന്നാല് എന്തു ചെയ്യണം സര് ?
ഓടി രക്ഷപെട്ടോണം… ഇവനൊക്കെ പാക്കിസ്ഥാനില് പട്ടിണീം പരിവട്ടോം ആയിട്ട് കിടക്കുന്നോനായിരിക്കും.. മറ്റവന് ഇവിടിപ്പോ സര്വപ്രതാപത്തില് കഴിയുന്നത് കണ്ടിട്ട് ഇനീം വരും… ഇവനെയൊക്കെ തീറ്റിപ്പോറ്റാന് ഖജനാവിലുള്ളത് എടുത്ത് ചിലവാക്കിയാല് പിന്നെ പാവം മന്ത്രിമാര് എസ്റ്റേറ്റ് വാങ്ങിക്കാനും സ്വിസ് ബാങ്കിലിടാനും പത്തു കാശിനു തെണ്ടേണ്ടി വരില്ലേടോ…
ശരി സര്…
അല്ലെടോ..അവന്മാരിതെങ്ങനെ ഇവിടെ വന്ന് ഇങ്ങനെ പൊട്ടിച്ച് പോകുന്നു… നമ്മളാണെങ്കില് ഒരുത്തനേം പിടിക്കുന്നുമില്ല..
അവന്മാര് ഭയങ്കരന്മാരാണ് സര്…
അതെയതെ..ഭയങ്കരന്മാരാണ്…
സര് സ്ഫോടനസ്ഥലം സന്ദര്ശിച്ചാല് നന്നായിരിക്കും..
ഒന്നു പോടാ ഉവ്വേ.. അവിടെ പൊട്ടാതെ വല്ലതും കിടപ്പുണ്ടെങ്കില്… എനിക്കു പേടിയാ.. ഇന്നലെ ട്രെയിനപകടമുണ്ടായിടത്ത് പോകാന് പറഞ്ഞിട്ട് പോയിട്ടില്ല പിന്നെയാ ഇവിടെ..വല്ല സൂനാമിയോ മറ്റോ ആണെങ്കില് ഹെലികോപ്റ്ററില് പോയി നോക്കാമായിരുന്നു…ഹൊ എന്തു രസമാണെന്നോ കാണാന്…
സര്,സുരക്ഷയെ സംബന്ധിച്ച് ജനത്തിന് ആശങ്കകളുണ്ട്…
പെട്ടെന്നു തന്നെ പൊലീസിനേം പട്ടാളത്തിനേം ഇറക്കെടോ… എല്ലാ കവലയിലും തോക്കുമായി നിന്ന് ജനത്തിന്റെ പേടി മാറ്റ്…
അല്ല സര്,ബോംബു പൊട്ടിച്ചിട്ട് തീവ്രവാദികള് ഇതുവഴി കറങ്ങി നടക്കില്ലല്ലോ സര്…
എടോ, അവന്മാരെ പിടിക്കാനല്ല പോകാന് പറഞ്ഞത്… ജനത്തെ ബോധിപ്പിക്കാന്… ഈ പറയുന്ന ജനം പോകുന്ന വണ്ടികളെല്ലാം തടഞ്ഞു നിര്ത്തി അഡ്രസ് എഴുതി വാങ്ങണം.. എങ്ങോട്ടു പോകുന്നു എന്തിനു പോകുന്നു എന്നൊക്കെ ചോദിക്കണം…മതി, എല്ലാം സേഫാണെന്നു കരുതി ജനം പോയിക്കിടന്നുറങ്ങിക്കോളും…പിന്നെ പറയുമ്പോ തനിക്കു പിണക്കം തോന്നരുത്… ഇങ്ങനെയൊരു സെക്യൂരിറ്റി ചെക്ക് ഇന്നലെ നടത്തിയിരുന്നെങ്കില് ചിലപ്പോ ഈ ദുരന്തം ഒഴിവാക്കാമായിരുന്നു…
നമ്മുടെ വിവിഐപീസിന് സെക്യൂരിറ്റി കൊടുക്കാന് തന്നെ ഉള്ള ഫോഴ്സ് പോര സര്, പിന്നെയല്ലേ സാധാരണ ജനം.. അതുമല്ല, പെട്ടെന്നൊരു ദിവസം ഒരു കാരണവുമില്ലാതെ സെക്യൂരിറ്റി ടൈറ്റാക്കിയാല് എന്തോ വരാന് പോകുന്നു എന്നു കരുതി ജനം പേടിക്കും… അവറ്റകളുടെ സമാധാനമല്ലേ സര് നമ്മള് ഉറപ്പാക്കേണ്ടത് ?
അതെയതെ… ഇന്റലിജന്സുകാരൊന്നും പറഞ്ഞില്ലേ ?
ഇന്റലിജന്സുകാര് കുറെപ്പേര് കേരളാ പൊറോട്ട അടിക്കുകയാണ് സര്, മറ്റേ പുള്ളീടെ വീട്ടില്…ബാക്കിയുള്ളവര് പുള്ളി നടത്തുന്ന പദയാത്ര കടന്നുപോകുന്ന വഴികളൊക്കെ സുരക്ഷിതമാണെന്നുപ്പു വരുത്താനും പുള്ളീടെ സല്പ്പേരും പ്രശസ്തിയും വര്ധിപ്പിക്കാനുമായി പദയാത്ര കടന്നുപോകുന്ന വഴികളില് പാവപ്പെട്ട കര്ഷകരുടെ ഫാന്സി ഡ്രസ്സിട്ട് നടക്കുകയാണ് സര്…
അല്ല അങ്ങേരോട് ബ്ലാസ്റ്റ് നടന്ന സ്ഥലമൊന്ന് സന്ദര്ശിക്കാന് പറഞ്ഞുകൂടെ.. പെട്ടെന്നു പ്രധാനമന്ത്രിയാകാം..
ഒന്നു ചുമ്മാതിരി സാറേ… പുള്ളിക്കിതൊക്കെ ഭയങ്കര പേടിയാ.. അല്ലെങ്കിലും മോന്റെ ദേഹത്ത് ഒരു തരി മണ്ണ് വീഴ്ത്തരുതെന്നാ മമ്മിയുടെ ഓര്ഡര്…
അതൊരു വഴിക്കു നടക്കട്ടെ.. ഞാനൊന്നും പറയുന്നില്ല…
സര് മരിച്ചവരുടെ ബന്ധുക്കള്ക്ക് നഷ്ടപരിഹാരം ?
പ്രഖ്യാപിച്ചേക്കാം… 20 പേരല്ലേയുള്ളൂ, അഞ്ച് ലക്ഷം വച്ചു പ്രഖ്യാപിച്ചേക്കാം… ഒരയ്യായിരം വച്ചു കൊടുക്കാം..
എന്നാപ്പിന്നെ ഞാനങ്ങോട്ട്…
എന്താടോ ഇത്ര തിരക്ക് ? താന് തന്നെ പോകണമെന്നില്ല… ഫോണിലൂടെ ഓര്ഡര് കൊടുത്താല് പോരേ ?
അതല്ല സര്, ഞാന് ഡിന്നര് കഴിച്ചിട്ടില്ല…ഇന്ന് തന്തൂരിയാണ് സ്പെഷല്…സ്കിപ് ചെയ്യാന് തോന്നുന്നില്ല..
ഓ,ഓകെ..ഞാന് കരുതി ബ്ലാസ്റ്റ് നടന്ന സ്ഥലത്തേക്കാണെന്ന്…ഡിന്നറിനാണെങ്കില് ഞാന് തടയുന്നില്ല… പോകുന്നേന് മുമ്പ് താനാ പത്രമോഫീസിലേക്കൊന്നു വിളിച്ചേ… അവന്മാരെന്തൊക്കെ എഴുതിപ്പിടിപ്പിക്കുമെന്ന് അറിയണമല്ലോ…
അത് ഞാന് നേരത്തേ ചോദിച്ചിരുന്നു.. അവരുടെ സ്റ്റോറി ലിസ്റ്റ് എന്റെ കയ്യിലുണ്ട് സര്..
മിടുക്കന് താനാണെടോ യഥാര്ഥ രാജ്യസ്നേഹി.. ആട്ടെ ആ ലിസ്റ്റ് ഒന്നു വായിച്ചേ… എന്തൊക്കെയാണ് അവന്മാരുടെ വാര്ത്തകള്…
ഞാന് വായിക്കാം സര്… 1.മരണസംഖ്യ (പരമാവധി)ഞെട്ടിക്കുന്ന തലക്കെട്ടിനോടൊപ്പം,സംഭവത്തിന്റെ ചുരുക്കിയുള്ള റിപ്പോര്ട്ട്, 2.സ്ഫോടനത്തിന്റെ ശബ്ദം കേട്ട മലയാളികളുടെ അനുഭവക്കുറിപ്പ്,ഫോട്ടോ സഹിതം, 3.മുംബൈയില് ഇതുവരെ നടന്നിട്ടുള്ള സ്ഫോടനങ്ങളുടെ ലിസ്റ്റും തീയതിയും മരിച്ചവരുടെ എണ്ണവും,4.സ്ഫോടനം നടന്നതെങ്ങനെ,തീവ്രവാദികള് വന്ന വഴി ഏത് തുടങ്ങിയ കാര്യങ്ങള് ചിത്രകാരന്റെ ഭാവനയില്,5.ആകാശദൂത് സിനിമ പോലെ മരണത്തെപ്പറ്റി പരത്തി എഴുതിയ ബോംബ് സാഹിത്യം (ചിന്നിച്ചിതറിയ ശരീരങ്ങളുടെ ചിത്രങ്ങള് സഹിതം),6.നേതാക്കന്മാരുടെ ഞെട്ടലുകള്,അനുശോചനങ്ങള്,ആഹ്വാനങ്ങള്….
എടോ അതില് നമ്മടേതിന്റെ കൂടെ ഒരു പടം കൂടി കൊടുക്കാന് പറയണേ… വല്ലപ്പോഴുമേ ഇങ്ങനൊരു സുവര്ണാവസരം കിട്ടൂ…
ശരി സര്… 7.ബോളിവുഡ് സിനിമാ നടന്മാരും നടിമാരും ട്വിറ്ററിലൂടെ തീവ്രവാദികളെ വഴക്കു പറഞ്ഞതിനെപ്പറ്റിയുള്ള വല്യ ഒരു ലേഖനം (നടിമാരുടെ സ്റ്റൈലന് പടങ്ങള് സഹിതം), 8.മുംബൈയ്ക്ക് പോകാന് ടിക്കറ്റ് ബുക്ക് ചെയ്തിട്ട് ട്രെയിന് മിസ്സായതുകൊണ്ട് സ്ഫോടനത്തില് നിന്ന് അത്ഭുതകരമായി രക്ഷപെട്ട തിരുവല്ലക്കാരന് ഫിലിപ്പോസ് മുതലാളിയെപ്പറ്റിയുള്ള ലേഖനം,9.സ്ഫോടനം നടന്ന തീയതിയുടെ പ്രത്യേകത,സംഖ്യാശാസ്ത്രം,ജ്യോതിഷം,മഷിനോട്ടം എല്ലാംകൂടി അരച്ചുകലക്കി വേറൊരു ഐറ്റം,10.കേസന്വേഷിക്കാന് പോകുന്ന ഉദ്യോഗസ്ഥന്മാരെപ്പറ്റിയുള്ള വിവരങ്ങളും അവരുടെ ഫോട്ടോയും പൂര്വചരിത്രവും മറ്റും…. ഇത്രേയുള്ളൂ സര്..
ഹഹഹ… കൊള്ളാമെടോ കൊള്ളാം.. പത്രക്കാരും നമ്മളെപ്പോലെ തന്നെ…ഒന്നും പേടിക്കാനില്ല.. ചായ വന്നില്ലല്ലോ…ഡിന്നറിനു മുമ്പ് ഹോട്ടായിട്ട് വല്ലോം കഴിക്കുന്നത് നല്ലതാ… താന് വാ…
