പാര്ട്ടി സെക്രട്ടറിക്ക് ഒരു കെസിവൈഎം* പ്രവര്ത്തകന്റെ തുറന്ന കത്ത്
ശവത്തില് കുത്തുകയാണെന്നു വിചാരിക്കരുത്. നിങ്ങള്ക്കും നിങ്ങടെ പാര്ട്ടിക്കും ഇതുതന്നെ വരണം. സഭയോടും പിതാക്കന്മാരോടും കളിച്ചാല് ഇങ്ങനെയിരിക്കും. എന്തൊക്കെയായിരുന്നു ? നികൃഷ്ടജീവി, വിദ്യാഭ്യാസക്കച്ചവടം, അഭയ കേസ്, ഒലക്കേടെ മൂട്… എന്നിട്ടിപ്പോ എന്തായി ? ഇനിയെങ്കിലും പിതാക്കന്മാരെ ബഹുമാനിച്ച് പള്ളിയോടും പട്ടക്കാരന്മാരോടും ബഹുമാനത്തിലൊക്കെ ജീവിച്ചാല് നിങ്ങള്ക്കു കൊള്ളാം.
ഞങ്ങടെ തങ്കം പോലത്തെ ഒരു പിതാവിനെക്കേറി നികൃഷ്ടജീവീന്നു വിളിച്ച അന്നു ഞങ്ങള് മനസ്സില് കുറിച്ചിട്ടതാ ഇത്. പോരാത്തതിനു ഒരു തെറ്റും ചെയ്യാത്ത ഞങ്ങടെ കോട്ടൂരച്ചനേം സെഫി സിസ്റ്ററേം ഇല്ലാത്ത കുറ്റം ആരോപിച്ച് പോലീസു ജീപ്പേല് കേറ്റി കോടതീക്കൊണ്ടുപോയി സഭയുടെ മേല് ചെളിവാരിയെറിഞ്ഞു. ഇതൊന്നും കര്ത്താവ് പൊറുക്കുകേല. ഇനീപ്പം മാണിസാറും ജോമോനും കൂടി കാര്യങ്ങള് ശരിപ്പെടുത്തിക്കൊള്ളും. ജോമോനെ കോട്ടയത്തു കര്ത്താവ് ജയിപ്പിച്ചത് പിന്നെന്നാത്തിനാന്നാ വിചാരം. സഭേടെ കോളേജും സ്കൂളുകളും ആശുപത്രിയുമൊക്കെ പകല്ക്കൊള്ളയാണ് നടത്തുന്നതെന്നു പറഞ്ഞ് ഇവിടെക്കെടന്ന് എന്നാ ബഹളവായിരുന്നു. തീര്ന്നല്ലോ. കൊള്ളയായിരുന്നെന്നു തന്നെ വെച്ചോ, എന്നാ ചെയ്യും ? ഞങ്ങടെ സഭ, ഞങ്ങടെ കോളേജ്, ഞങ്ങടെ പിള്ളേര്, ഇച്ചിരെ കൊള്ളയടിച്ചാല് ഞങ്ങളങ്ങു സഹിച്ചു. പിന്നെ, നിങ്ങടെ പിള്ളേരേം പിറുങ്ങാണിയേം ഒന്നും ഞങ്ങടൈ കോളേജുകളിലോട്ടു വിളിച്ചില്ലല്ലോ.
മതമില്ലാത്ത ജീവനെന്നും പറഞ്ഞ് പുസ്കമിറക്കീപ്പം മുതല് ഞങ്ങളു പറയുന്നതാ, വേണ്ടാ.. പള്ളിയെത്തൊട്ടൊരു കളി വേണ്ടാന്ന്. ഒതപ്പൊണ്ടാക്കാന് ബേബിയായിട്ടും കൂബിയായിട്ടും കുറെ തലതിരിഞ്ഞവന്മാര് നിങ്ങടെ കൂടേം കാണും. ഇനിയിപ്പോ എല്ലാവരും എല്ലാം മനസ്സിലാക്കും. ഞാനായിട്ടു നിര്ബന്ധിക്കുന്നില്ല. നിങ്ങളായിട്ടു വന്ന് പിതാവിന്റെ കാലുപിടിക്കുവോ കരയുവോ എന്നതാന്നു വച്ചാ ചെയ്തോ. ഞങ്ങള് ക്രിസ്ത്യാനികളെല്ലാം കൂടി ഒന്നിച്ചു വോട്ടുചെയ്താല് ഇവിടെ എന്നാ ഒക്കെ നടക്കുമെന്ന് ഇപ്പോ മനസ്സിലായിക്കാണുമല്ലോ. ഇടുക്കീപ്പോലും ഫ്രാന്സീസ് ചെയ്ത പോലെ മണ്ഡലത്തില് വികസനം ചെയ്ത വേറൊരാളില്ല. എന്നിട്ടും ഫ്രാന്സീസിനെ പുല്ലുപോലെ തോപ്പിച്ചേച്ച് ഞങ്ങള് പി.ടി.യെ കേറ്റിവിട്ടില്ലേ. വികസനോം കോപ്പുമൊന്നും പറഞ്ഞാല് ഇവിടെ കാര്യം നടക്കുകേലന്നു മനസ്സിലായില്ലേ ? ഇറവെറന്സിനിപ്പോ വരമ്പത്താ കൂലി, ഹല്ല പിന്നെ !
അല്ലെങ്കിലും സോണിയജി അവിടെയുള്ളപ്പോള് ഞങ്ങള്ക്ക് സഹായിക്കാതിരിക്കാനും ബുദ്ധിമുട്ടാണ്. മാര്പ്പാപ്പയും റോമും ഒക്കെയുള്ള ഇറ്റലിയില് നിന്നൊരു ധീരവനിത നമ്മുടെ രാജ്യത്തെ രക്ഷിക്കാന്, നമുക്ക് നന്മയിലേക്കുള്ള വഴിതെളിക്കാന് ദൈവനിയോഗം കൊണ്ടെന്നപോലെ വന്നു നില്ക്കുമ്പോള് ആ അവസരം തട്ടിയെറിയുന്നത് മണ്ടത്തരമാണ്. മദര്തെരേസയ്ക്കു ശേഷം സോണിയാജിയാണ് ഭാരതത്തിനു പുണ്യവുമായി എത്തിയിരിക്കുന്നത്. രാഹുലിന്റെയും പ്രിയങ്കമോളുടെയും മുഖത്തേക്കു നോക്കുമ്പോള് മനസ്സിനു വലിയൊരു ധൈര്യമാണ്. പ്രത്യേകിച്ച് ഞങ്ങള് യുവജനപ്രസ്ഥാനക്കാരുടെ വെളിച്ചമാണ് രാഹുല്, നാളത്തെ ഇന്ത്യയുടെ പ്രതീക്ഷയാണ് രാഹുല്.
കേരളത്തില് നിങ്ങളുടെ പ്രസക്തി ഇല്ലാതായതുകൊണ്ട് തന്നെ ഇവിടെ ഇനി വികസനം വരും. വികസനം എത്തിനോക്കാതെ കിടക്കുന്ന ആയിരക്കണക്കിനേക്കര് നെല്പാടങ്ങളില് ഞങ്ങള് ടിപ്പറിനു മണ്ണടിക്കും. പ്ളോട്ടു പ്ളോട്ടായിട്ടു സ്ഥലം മുറിച്ചു വില്ക്കും. അതോടെ ഇവിടുത്തെ റിയല് എസ്റ്റേറ്റ് രംഗം പുഷ്ടിപ്പെടും മാന്ദ്യം മാറും. ശാന്തിയും സമാധാനവും കളിയാടും. കംപ്ളീറ്റ് പാറമടകളും ഞങ്ങള് പൊട്ടിച്ചുവില്ക്കും. അച്ചായന്മാരുടെ പ്രൈവറ്റ് ബസിനു മുമ്പിലും പുറകിലും കെഎസ്ആര്ടിസി സര്വീസ് ഇടുന്ന പരിപാടി ഇന്നത്തോടെ നിര്ത്തിക്കോണം. നിങ്ങടെ തന്നെ ഭാഷയില് പറഞ്ഞാല് ജനപിന്തുണയില്ലാത്ത നിങ്ങടെ ബൂര്ഷ്വാ സര്ക്കാരിന് ഇനിയിവിടെ വോയ്സ് ഇല്ല. രാജിവച്ചൊഴിഞ്ഞുപോയാല് അത്രയും നല്ലത്.
കൂടുതലൊന്നും എനിക്കു പറയാനില്ല. സഭേത്തൊട്ടൊരു കളി വേണ്ട. അന്നേ ഞങ്ങളു പറഞ്ഞതാ രണ്ടാം വിമോചനസമരം വരും രണ്ടാം വിമോചന സമരം വരും എന്ന്. അപ്പോ അതേതാണ്ട് പന്തം കൊളുത്തിപ്രകടനം പോലേതാണ്ടാണെന്നു കരുതി നിങ്ങളിരുന്നു. സംഗതി എന്നതാണെന്നിപ്പോ മനസ്സിലായല്ലോ. ഇതൊക്കെ തന്നെയാണ് ഞങ്ങളുദ്ദേശിച്ചത്.സത്യത്തില് കമ്മ്യൂണിസ്റ്റുകാരെ കേരളത്തില് നിന്നു ഉന്മൂലനം ചെയ്യുകയായിരുന്നു ഞങ്ങളുടെ ലക്ഷ്യം. അതു നടന്നില്ല. യുഡിഎഫിനു നഷ്ടമായ നാലു മണ്ഡലങ്ങളില് ക്രിസ്ത്യന് വോട്ടു ചോര്ച്ച ഉണ്ടായിട്ടുണ്ടോ എന്നു ഞങ്ങള് പരിശോധിക്കും. രൂപതാ തലത്തിലും ഇടവക, വാര്ഡ് തലങ്ങളിലും പ്രത്യേക അന്വേഷണ കമ്മിഷനുകള് രൂപീകരിക്കും. സഭയുടെ പരമ്പരാഗത വോട്ടുകള് എല്ലാം യുഎഡിഎഫിനു കിട്ടിയിട്ടുണ്ടോ എന്നതു സൂക്ഷ്മമായി പരിശോധിക്കും. ഒരു കാര്യം മനസ്സിലാക്കുക സോവിയറ്റ് യൂണിയന് തകര്ന്നു ഛിന്നഭിന്നമായതിനു പിന്നില് ഞങ്ങള് ക്രിസ്ത്യാനികളുടെ പ്രാര്ത്ഥനയാണ്. ഇതൊരു ഭീഷണിയല്ല, മുന്നറിയിപ്പു മാത്രമാണ്.
* കത്തോലിക്കായുവജനപ്രസ്ഥാനം.
