മുടിഞ്ഞ പ്രേമം (കവിത)
പെണ്ണേ എനിക്കു നിന്നോടു മുടിഞ്ഞ പ്രേമമാണ്
മറ്റവളോടും അങ്ങനെ തന്നെയായിരുന്നു.
പക്ഷെ അവളോട് ഇങ്ങനെയൊന്നും ആയിരുന്നില്ല.
നീ എന്നെയും കൊണ്ടേ പോകൂ എന്നു തോന്നുന്നു.
ഞാന് പണിയൊന്നും ചെയ്യുന്നില്ല എന്നിന്നലെ സാറ് പറഞ്ഞു.
എങ്ങനെ പണി ചെയ്യും, കംപ്യൂട്ടറില് ഏതു വിന്ഡോ തുറന്നാലും
നിന്റെ മുഖമാണ് കാണുന്നത്, റീ സൈക്കിള് ബിന്നിലും നീ.
നിന്റെ നേര്ത്ത സ്വരമാണ് കേള്ക്കുന്നത്, പേടിച്ച്
ഞാന് സ്പീക്കറുകള് ഓഫാക്കി വച്ചിരിക്കുകയാണ്.
ദിവസങ്ങളായി ഞാന് ഫുള് പട്ടിണിയാണ്.
എനിക്കു വിശപ്പില്ല, ഒന്നും ഇറങ്ങുന്നില്ല.
വല്ലതും കഴിച്ചാലും ഛര്ദിക്കണമെന്നു തോന്നും
നീ എന്റെ ഉള്ളിലിരുന്നു തികട്ടുകയാണ് !
വേണ്ട ഞാന് പട്ടിണി കിടന്നോളാം..
എനിക്കൊന്നിനും ഒരിതില്ല പെണ്ണേ. ഞാനിവിടെ
അനങ്ങാതെ ഒരു മൂലയ്ക്കിരുന്നോളാം..
ഇവിടിരുന്ന് നിന്നെയോര്ത്തോര്ത്തോര്ത്ത്
പണ്ടാരമടങ്ങാനായിരിക്കും എന്റെ വിധി.
എവിടെ നോക്കിയാലും നിന്നെയേ കാണാനുള്ളൂ
നിന്റെ ചിന്തയേ എനിക്കുള്ളൂ..
കൂടുതല് വഷളനാവാനാണ് ഞാന് നിന്നെ പ്രേമിച്ചത്
എന്നിട്ടിപ്പോള് നന്നായി ഒരു ഗുണമില്ലാത്തവനായി.
നിന്നെയും കൊണ്ട് വല്ല റിസോര്ട്ടിലും പോകാമെന്നു
കരുതിയിട്ട്, എനിക്കിപ്പോള് ആരെയും വേണ്ടാതായി
കുടിച്ചു കൂത്താടി നിന്നെ തെറിവിളിക്കാമെന്നു കരുതിയിട്ട്
കുടി നിര്ത്തി ഞാനിപ്പോള് വെറും ഡീസന്റായി
അഞ്ചു മിനിട്ടുപോലും പാഴാക്കാതെ അര്മാദിച്ചിരുന്ന
എനിക്കിപ്പോള് അഞ്ചരക്കെണീറ്റ് നിന്റെ മുറിയില് വെളിച്ചമുണ്ടോ
എന്നു നോക്കലാണ് പണി. നീ കുളിച്ചോ, കുറിയിട്ടോ അങ്ങനെ
നിന്നെക്കുറിച്ചോര്ക്കനല്ലാതെ സമയമില്ല..
ഉച്ചയ്ക്കു നീയുണ്ടോ, ഓഫിസില് കിടന്നുറങ്ങിയോ,
ബോസിന്റെ തെറി കേട്ടോ (അവനെ ഞാന് അരിയും),
വൈകിട്ടിങ്ങെത്തിയോ എന്നൊക്കെയല്ലാതെ
എനിക്കിപ്പോള് ഒന്നും ആലോചിക്കാനില്ല.
പ്രേമം ആരെയും കവിയാക്കുമെന്നു പറയുന്നത്
സത്യമാണ്. നോക്കൂ, ഞാന് പോലും മുടിഞ്ഞ
കവിതകളെഴുതുന്നു, ഞാനാരാ മോന് !
ഈ കവിതയ്ക്ക് നിന്റെ നുണക്കുഴിയുടെ വൃത്തമാണ്
നിന്റെ ചിരിയുടെ അലങ്കാരമാണ്..
ഇതും പറഞ്ഞ് വല്ല നിരൂപകന്മാരും വന്നാല്
ഞാനവന്റെയൊക്കെ പരിപ്പെടുക്കും.
ഞാനെന്റെ കച്ചവടം നിര്ത്തി, കലാപരിപാടികള്
അവസാനിപ്പിച്ച്, എല്ലാ ഉഡായ്പ്പുകളും നിര്ത്തി
ഡീസന്റായി നില്ക്കുകയാണ്. എങ്ങാനും നിന്നെ
എനിക്കു കിട്ടിയെങ്കിലോ എന്നു കരുതി
കാത്തുനില്ക്കുകയാണ് പാവം ഞാന്.
എനിക്കറിയാം, എന്റെ കാര്യം പോക്കാണ്..
പക്ഷെ, ഒന്നുണ്ട്. നിന്നെ മറന്നിട്ട്, ഈ മുടിഞ്ഞ
പ്രേമത്തില് നിന്നൂരിയിട്ട് എനിക്കൊരു മയിരും വേണ്ട !
മുടിയാനാണെങ്കില് മുടിയട്ടെ പണ്ടാരം !
____________________________________
ആദ്യ കമന്റ്- (ലവളാണ്, മറ്റവള്)- ആരോടാ..
ഈ മുടിഞ്ഞ പ്രേമം ? കുറച്ചു ദിവസമായി ഞാന്
ശ്രദ്ധിക്കുന്നു ! ചോദിച്ചാല് ബ്ലോഗാണ് കവിതയാണ്..
അത്രയ്ക്കു മൂത്തെങ്കില് അവളുടെ കൂടെ പൊറുത്തോ !
