ബാബുക്കുട്ടന് !
വയസ് 26. പ്രായം പ്രവചനാതീതം.പക്ഷേ ശതകോടി യുഗങ്ങള്ക്കു മുന്പേ അവനുണ്ട്.
പണ്ട് വനാന്തരങ്ങളില് മനുഷ്യന് മൃഗീയമായി ജീവിക്കുന്പോള്, കല്ലും മുള്ളും നിറഞ്ഞ കാനനപാതയിലൂടെ പുരോഗതിയുടെ ചക്രം തെളിക്കുന്പോള്, ബാബുക്കുട്ടന് മിനുസമുള്ള കല്ലില് ചടഞ്ഞിരുന്ന് വ്യവസ്ഥിതിയെ കീറിമുറിച്ചു കുറ്റം വിധിക്കുകയായിരുന്നു.
പിന്നെ, ജീവിതം കുടിലുകളിലേക്കും ചെറിയ ഗ്രാമങ്ങളിലേക്കും മാറിയപ്പോള് അവന് ചടഞ്ഞിരിക്കാന് കൂടുതല് മിനുസമുള്ള ഇടങ്ങള് കിട്ടി. വ്യവസ്ഥിതിക്കു പുറമേ അവന് സ്ഥിതിയെയും വിമര്ശനവിധേയമാക്കി. ഗ്രാമങ്ങള് ചെറുനഗരങ്ങളും നഗരപ്രാന്തങ്ങളുമായപ്പോള് ബാബുക്കുട്ടന് സൃഷ്ടിക്കുന്ന അസ്വസ്ഥതകള്ക്ക് ആവശ്യക്കാരുണ്ടായി. അവന്റെ അസഹിഷ്ണുത സമൂഹത്തിന്റെ ഭാഗമായി. ഡിമാന്റും സപ്ളൈയും തമ്മില് ചേരാതെ വന്നപ്പോള് കൂടുതല് ബാബുക്കുട്ടന്മാരുണ്ടായി.
സ്ഥിതിക്കും വ്യവസ്ഥിതിക്കും പുറമേ സൃഷ്ടിയും സംഹാരവും വരെ അവരുടെ അഖണ്ഡയജ്ഞത്തിനിരയായി. കാലം മാറി. റോഡുകളും വാഹനങ്ങളും വന്നു. ബാബുക്കുട്ടന് പ്രസ്ഥാനമായി. പല മേഖലകളിലായി കുറെയധികം ബാബുക്കുട്ടന്മാരുണ്ടായി. തങ്ങളുടെ ആക്ഷേപഹാസ്യത്തിന് സ്പെഷലിസ്റ്റ് മേഖലകള് കണ്ടെത്തി. പലരും സാഹിത്യകാന്മാരായി. കുറെ പേരാകട്ടെ സര്ക്കാരുദ്യോഗസ്ഥരും രാഷ്ട്രീയക്കാരുമായി. പറയുന്നതെന്തും പ്രസിദ്ധീകരിക്കുമെന്നായപ്പോള് പുലഭ്യം ഉച്ചത്തിലായി.
കാര്യങ്ങള് ഓണ് ലൈനായപ്പോള് ബാബുക്കുട്ടന്മാരും ഓണ് ലൈനായി. മധ്യപൂറ്വേഷ്യന് രാജ്യങ്ങളിലേക്കും അമേരിക്കന് ഐക്യനാടുകളിലേക്കും യൂറോപ്പിലേക്കും കുറെയാളുകള് ചേക്കേറി. അപ്പാര്ട്ട് മെന്റിന്റെ ചുവരുകള്ക്കിടയില് ഹൌസ് കീപ്പിങ്ങും ബേബി സിറ്റിങ്ങുമായി കുടുങ്ങിപ്പോയ ബാബുക്കുട്ടന്മാര് ഓണ് ലൈന് ജനാലകള് വഴി കൃത്യം തുടരുകയാണ്…
