തടിയന്റവിട വിജയന്
ഇത് ഗുരുതരമായ ഒരു പ്രശ്നമാണ്. തീവ്രവാദം എന്നത് ആര്ക്കും ആരുടെ നേരേയും ഉപയോഗിക്കാവുന്ന ഒരു വടിയായി മാറിയിരിക്കുന്ന ഇക്കാലത്ത് പാര്ട്ടിയോടും പാര്ട്ടി ആശയങ്ങളോടും അനുഭാവം കാണിക്കുന്ന സധാരണക്കാരായ ജനങ്ങളെ തീവ്രവാദികളായി മുദ്രകുത്തി തുറുങ്കിലടക്കാനും അമേരിക്കയ്ക്ക് ബലി കൊടുക്കാനുമുള്ള കേന്ദ്രസര്ക്കാരിന്റെ ഗുഢപദ്ധതിയുടെ ഭാഗമാണ് ഇപ്പോള് സംസ്ഥാനത്ത് നടക്കുന്ന തീവ്രവാദക്കേസും അതോടനുബന്ധിച്ച് ഇവിടുത്തെ സിന്ഡിക്കറ്റ് മാധ്യമങ്ങള് പടച്ചുണ്ടാക്കുന്ന കള്ളക്കഥകളും.
അബ്ദുല് നാസര് മദനി ഒരു നല്ല ചെറുപ്പക്കാരനാണ്. അദ്ദേഹം പാര്ട്ടിയുമായി സഹകരിച്ചു എന്നതിന്റെ പേരില് അദ്ദേഹത്തെ തീവ്രവാദക്കേസില് കുടുക്കി പ്രതികാരം ചെയ്യാനുള്ള നടപടികളാണ് ഇപ്പോള് കേന്ദ്രസര്ക്കാര് ആസൂത്രണം ചെയ്തു നടപ്പാക്കുന്നത്. ഇത് ഇവിടെ നടക്കില്ല. കേരളം പോലൊരു സംസ്ഥാനത്ത് ഇത്തരം നടപടികള് ഞങ്ങള് വച്ചുപൊറുപ്പിക്കില്ല. ഞാന് ചോദിക്കട്ടെ, സുഹൃത്തുക്കളെ, ഇപ്പോള് കുറ്റക്കാരനെന്നു മുദ്രകുത്തിയിരിക്കുന്ന ബഹുമാനപ്പെട്ട നസീര് എന്തു കുറ്റമാണ് ഹേ ചെയ്തിരിക്കുന്നത് ? എന്തപരാധം ചെയ്തതിന്റെ പേരിലാണ് അദ്ദേഹത്തെ ബംഗാദേശില് നിന്നും വലിച്ചിഴച്ച് ഇവിടെ തലമൂടി കൊണ്ടുനടന്ന് പീഡിപ്പിക്കുന്നത്. മറുപടി പറയേണ്ടി വരും.
ഈ പോക്കാണെങ്കില് അമേരിക്കയിലെ വേള്ഡ് ട്രേഡ് സെന്റര് ആക്രമണവും അഫ്ഗാനിസ്ഥാനിലെ പ്രശ്നങ്ങളും എല്ലാം ബഹുമാനപ്പെട്ട നസീറിന്റെ പേരില് ആരോപിക്കില്ലെന്നാരു കണ്ടു. മുമ്പ് ആത്മഹത്യകളെന്നു സ്ഥിരീകരിച്ച ചില മരണങ്ങള് കൂടി നസീറിന്റെ പേരില് കെട്ടിവയ്ക്കാനും ശ്രമം നടക്കുന്നുണ്ട്. കിണറ്റില് ചാടി മരിച്ച സിസ്റ്റര് അഭയ, സ്വയം കുത്തി മരിച്ച മൂത്തൂറ്റ് പോള് എം.ജോര്ജ് എന്നിവരെയും നസീര് ആണ് കൊന്നതെന്നു വരുത്തിത്തീര്ക്കാന് നീക്കം നടക്കുന്നുണ്ടെന്നാണ് ഇപ്പോള് കേള്ക്കുന്നത്. ഇന്റര്പോള്, ഔട്ടര് പോള്, സൈഡ് പോള് തുടങ്ങിയ ഏജന്സികള് ഈ ദുരൂഹനീക്കങ്ങള്ക്കു വേണ്ട സഹായം ചെയ്തു കൊടുക്കുകയുമാണ്.
ഇത് ഒരു മതവിഭാഗത്തിനെതിരെ എന്നു മാത്രമല്ല, കണ്ണൂര് സ്വദേശിയായ ഒരു ചെറുപ്പക്കാരനെതിരേ കൂടിയുള്ള സംഘടിതമായ ആക്രമണത്തിന്റെ ഭാഗമാണ്. ഇക്കഴിഞ്ഞ ഉപതിരഞ്ഞെടുപ്പിന്റെ സമയത്ത് കണ്ണൂര് ജില്ലാ കളക്ടറോട് അവര് ചെയ്തതെന്താണെന്ന് നമ്മള് കണ്ടതാണ്. കണ്ണൂരില് കോണ്ഗ്രസിന്റെ അക്രമ-ഗുണ്ടാ രാഷ്ട്രീയം കൊണ്ട് ജനങ്ങള് പൊറുതിമുട്ടിയിരിക്കുകയാണ്. അതിന്റെ കൂടെയാണ് ഒരു പാവം ചെറുപ്പക്കാരനെ തീവ്രവാദക്കേസില് കുടുക്കി കണ്ണൂരിലെ ജനങ്ങളോടു പ്രതികാരം ചെയ്യാനുള്ള ശ്രമം.
ബഹുമാനപ്പെട്ട നസീര് സഖാവ് ഇ.കെ.നായനാരെ വധിക്കാന് ശ്രമിച്ചു എന്നാണ് ഇപ്പോള് പറയുന്നത് ? ആരെ പറ്റിക്കാനാണ് ഇപ്പോള് ഇത്തരം കള്ളക്കഥകള് മെനയുന്നത് ? മദനിയുടെ ഭാര്യ സൂഫിയ മദനി തമിഴ്നാട് സര്ക്കാരിന്റെ ബസ് കത്തിച്ചു എന്നാണ് മറ്റൊരു കേസ്. സത്യത്തില് രണ്ടു മാസത്തെ ശമ്പളക്കുടിശ്ശിക വന്ന ബസിന്റെ ഡ്രൈവര് തന്നെ രാത്രിയില് പെട്രോള് ഒഴിച്ചു ബസ് കത്തിക്കുകയായിരുന്നു. ഇതിന് രാത്രിയില് ക്വട്ടേഷന് ജോലിക്കു പോവുകയായിരുന്ന നാല് ചെറുപ്പക്കാര് സാക്ഷികളാണ്. ഇതൊന്നും ശ്രദ്ധിക്കാതെ, പാര്ട്ടിയോടുള്ള ശത്രുത മത്രം വച്ച് മദനിയെയും ഭാര്യയെയും പീഡിപ്പിക്കാനാണ് ഇവിടെ ചിലര് ശ്രമിക്കുന്നത്.
ബഹുമാനപ്പെട്ട നസീര് എന്ന ചെറുപ്പക്കാരന് സൂഫിയ മദനിയെ ഫോണ് വിളിച്ചു എന്നതിന്റെ പേരിലാണ് ഇത്തരം ആരോപണങ്ങള് ഉന്നയിക്കുന്നത്. ഇതൊന്നും അംഗീകരിച്ചു തരാന് പറ്റില്ല. ഇതൊക്കെ ഗുജറാത്തില് നടക്കും. ഇത്തരം കള്ളക്കഥകള് പറഞ്ഞ് പാര്ട്ടിയെയും പാര്ട്ടിയുടെ സുഹത്തുക്കളെയും പീഡിപ്പിക്കാന് ആര്ക്കുമാവില്ല. ഇത്തരം ക്രൂരതകള് കണ്ടു നില്ക്കാനും പോകുന്നില്ല. ഇതിന് ശക്തമായ തിരിച്ചടി ഞങ്ങള് നല്കും. ലഷ്കര് ഇ ത്വയ്ബയോ അല് ക്വയ്ദയോ പാര്ട്ടിയെ സഹായിക്കാന് മുന്നോട്ടു വന്നാല് അത് വേണ്ടെന്നു വയ്ക്കേണ്ട കാര്യമില്ല. പാര്ട്ടിയുടെ ആശയങ്ങളോട് താല്പര്യമുള്ള ആര്ക്കും അത്തരത്തില് മുന്നോട്ടു വരാന് അവകാശമുണ്ട്. അതിന്റെ പേരില് പാര്ട്ടിയെ പീഡിപ്പിക്കാനാണ് നീക്കമെങ്കില് മറുപടി മറ്റൊരു ഭാഷയിലായിരിക്കും. അല്ലെങ്കിലും ഇങ്ങനൊക്കെ ആരോപിക്കാന് എന്തു വിവരക്കേടാണ് ഹേ, നിങ്ങള്ക്കുള്ളത്. നാട്ടിലെ പ്രമുഖ വേശ്യയുടെ അടുത്ത് ഹിന്ദുവും മുസ്ലിമും ക്രിസ്ത്യാനിയുമൊക്കെ വന്നുപോകുന്നില്ലേ ? അപ്പോഴൊന്നും വേശ്യ മതംമാറി അവരുടെ ആദര്ശങ്ങളും വിശ്വാസങ്ങളും സ്വീകരിക്കുന്നില്ലല്ലോ. പിന്നെന്തിനു പാര്ട്ടിയോടു മാത്രം ഈ സമീപനം എന്നതാണ് ചോദിക്കുന്നത്.
ഇക്കാര്യത്തില് പാര്ട്ടി നല്കിയിരിക്കുന്ന ഭീഷണികള് വകവയ്ക്കാതെ ഇതെപ്പറ്റി ഇമെയിലുകള് അയക്കുന്ന ഏതദേശം രണ്ടു രണ്ടരക്കോടി ആളുകള്ക്കെതിരെ പാര്ട്ടി ഫത്വ പുറപ്പെടുവിപ്പിച്ചിട്ടുണ്ട്. ഇവര്ക്ക് ഈ മെയിലുകള് ഫോര്വേഡ് ചെയ്യാന് അവസരമൊരുക്കിയ ഗൂഗിള്, യാഹൂ, മൈക്രോസോഫ്റ്റ് എന്നീ കമ്പനികളും ഇത്തവണ കുടുങ്ങും. ഇക്കാര്യത്തില് കര്ശന നടപടികളുമായി മുന്നോട്ടു പോകാനും ഈ കമ്പനികളുടെ പ്രവര്ത്തനം നിരോധിക്കാനും വേണ്ട നടപടികള് ആരംഭിച്ചു കഴിഞ്ഞു. ഇന്റര്നെറ്റും ഇമെയിലും കംപ്യൂട്ടറും ഇല്ലാത്ത ആ മാതൃകാലോകം തീര്ക്കാനുള്ള എന്റെയും മദനിച്ചേട്ടന്റെയുമൊക്കെ പരിശ്രമത്തില് പങ്കാളികളാവുക, ജീവന് രക്ഷിക്കുക.
എന്ന് സ്വന്തം,
തടിയന്റവിട വിജയന്,
ഹൌസ് ഓണര്,
കണ്ണൂര്.
