ദൈവത്തിന്റെ മരണം: ഒരു ഫ്ലാഷ് ബാക്
ദൈവങ്ങള്ക്കു പണ്ടേ കഷ്ടകാലമാണ്. കലികാലമെന്നു പറയുമ്പോള് അങ്ങനെയാണ്. കണ്ട അണ്ടനും അടകോടനുമെല്ലാം സുഖമുണ്ടാവും. ഇവന്മാര്ക്കെല്ലാം ദര്ശനം നല്കി, അനുഗ്രഹം ചൊരിഞ്ഞ് കാത്തുസൂക്ഷിക്കുന്ന ദൈവത്തിന്റെ ലൈഫ് കോഞ്ഞാട്ടയാകും. ദൈവങ്ങളുടെ സ്വന്തം സംസ്ഥാനമായ കേരളത്തില് ഇനി ആകെ മൊത്തം ടോട്ടല് എത്ര ദൈവം ബാലന്സ് ഉണ്ടാവുമെന്നറിയില്ല. വളരെ ശക്തനായിരുന്ന ഒരു ദൈവത്തിന് ഇപ്പോള് ദിവസം 40 രൂപ കൂലിക്ക് സെന്ട്രല് ജയിലില് നെയ്ത്താണു പണി. അദ്ദേഹത്തെ മധ്യസ്ഥനായി കിട്ടിയതില് ഒരു നെയ്ത്തുകാരനു പോലും ഒരു സന്തോഷം കാണുന്നില്ല. ആരും സന്തോഷ് മാധവന് ബ്രാന്ഡ് ധോത്തികളോ വേഷ്ടികളോ കോണകങ്ങളോ പോലും പുറത്തിറക്കുന്നില്ല. ആലോചിച്ചു നോക്കണം, നഗ്നപൂജയില് വിശ്വസിച്ചിരുന്ന ദൈവത്തെക്കൊണ്ട് വസ്ത്രം നെയ്യിക്കുന്നു. ദൈവങ്ങളോടിങ്ങനെ ചെയ്യുന്ന മാര്ക്സ്സിസ്റ്റുകാര് അനുഭവിക്കും.
പോട്ടെ, സന്തോഷത്തോടെ മാധവേട്ടന് വിശ്വരൂപം കൂട്ടി വേണമെങ്കില് തിരിച്ചു വരാം. അന്നു കമ്യൂണിസ്റ്റുകാരെയും പോലീസുകാരെയും അദ്ദേഹത്തെക്കുറിച്ച് സകല അപരാധവും എഴുതി വിട്ട പത്രക്കാരെയും ഭസ്മമാക്കാം. പക്ഷെ, പീഡിപ്പിച്ച് പീഡിപ്പിച്ച് ഒരു ദൈവം സയനൈഡ് കഴിച്ച് ആത്മഹത്യ ചെയ്യുകയെന്നൊക്കെ പറഞ്ഞാല് ? രുദ്രത്ത് വിഷ്ണുമായ മഠത്തിന്റെ കവാടങ്ങള്ക്കപ്പുറത്ത് ജനലക്ഷങ്ങള്ക്ക് ആശ്വാസവും ആവേശവും ആയിരങ്ങളുടെ അഭിനിവേശവുമായിരുന്ന പുണ്യവനിത ദിവ്യ ജോഷി ചുമ്മാ സയനൈഡ് കഴിച്ചു മരിച്ചു, അതും പുണ്യ മാതാശ്രീയോടൊപ്പം. ഇതൊക്കെ പോലീസ് പറയുന്നതാണു കേട്ടോ. ഇനി പത്രങ്ങള് അന്വേഷണം നടത്തിയിട്ടു വേണം സത്യമറിയാന്. ആ സയനൈഡ് എസ് ആകൃതിയിലുള്ള കുപ്പിയിലാണ് വന്നതെന്നോ, ആ സയനൈഡ് പോലീസ് പറഞ്ഞിട്ട് വല്ല സ്വര്ണപ്പണിക്കാരും കൊടുത്തതാണെന്നോ നാളെ മാധ്യമങ്ങള് തെളിയിച്ചാല് കളി മാറും.
പുത്തന്പാലം രാജേഷ് എന്നൊക്കെ പറയുന്നതുപോലെ ഈ കഥയിലും ഒരു വില്ലനുണ്ട്. കുന്നംകുളം ജോര്ജ്. ക്വട്ടേഷന്കാരനല്ലന്നേയുള്ളൂ. തന്റെ മരണത്തിനുത്തരവാദി തിന്മകളുടെ വക്താവായ ജോര്ജ് ആണെന്ന് പുണ്യ ആത്മഹത്യാക്കുറിപ്പിലും പറയുന്നുണ്ടത്രേ. ജോര്ജ്ജിന്റെ വീട്ടില് 500 കോടി രൂപയുടെ നിധിയുണ്ടെന്ന് ദിവ്യദൃഷ്ടിയില് കണ്ടെന്നും ഇത് കണ്ടെത്തുന്നതിന് തങ്കവിഗ്രഹം ഉണ്ടാക്കി ചാത്തനെ ആവാഹിയ്ക്കുന്നതിന് 90 ലക്ഷംരൂപ ആവശ്യമുണ്ടെന്ന് പറഞ്ഞ് ദിവ്യ ദൈവവും ജോഷി ദൈവവും കൂടി പണം തട്ടിയെന്നു പറഞ്ഞ് ക്രൂരനായ ജോര്ജ് പരാതി നല്കിയതിന്റെ അടിസ്ഥാനത്തില് കുപ്രസിദ്ധരായ കേരളാ പോലീസ് പുണ്യ ജോഷിയെ അറസ്റ്റ് ചെയ്തതോടെയാണ് പുണ്യ ദിവ്യയും പുണ്യ മാതാശ്രീയും പുണ്യ സയനൈഡ് കഴിച്ച് പുണ്യമരണം പുല്കിയത്.അറസ്റ്റ് ഭയന്നാണ് ദൈവം ചത്തുകളഞ്ഞതെന്നാണ് പോലീസ് ഭാഷ്യം. അല്ലെങ്കിലും ഇവിടെ പോലീസിന് എന്തുമാവാമല്ലോ.
വിഷ്ണുമായയാണെന്ന് സ്വയം പ്രഖ്യാപിച്ച് പ്രവചനവും രോഗശാന്തി വാഗ്ദാനവും നല്കി മൂന്നു വര്ഷം മുമ്പാണ് ഭര്ത്താവുമൊത്ത് ദിവ്യാജോഷി പറപ്പൂക്കരയില് ആശ്രമം ആരംഭിച്ചത്. പുതുക്കാട് വിഷ്ണുമായ ക്ഷേത്രത്തില് ബ്രാഹ്മമുഹൂര്ത്തത്തില് കുളിച്ച് ഈറനണിഞ്ഞ് ഒറ്റമുണ്ടില് ദര്ശനം നല്കുന്ന യുവ സന്യാസിനിയെ കാണാന് സാധാരണക്കാര് മാത്രമല്ല, തമിഴ്, തെലുങ്ക് സിനിമാ താരങ്ങളും രാഷ്ട്രീയക്കാരും പൊലീസു ഉദ്യോഗസ്ഥരും ഉള്പ്പെടെ പലരും എത്തിയിരുന്നു. ചലചിത്ര താരങ്ങളുടെയും അതിവിശിഷ്ട വ്യക്തികളുടെയും കാണപ്പെട്ട ദൈവമായിരുന്നു ദിവ്യാ ജോഷി. ചരിത്രപ്രാധാന്യമുള്ള ഈ ‘ഈറനുടുത്തും കൊണ്ടമ്പലം ചുറ്റുന്ന’ വിഡിയോ സ്ലോ മോഷനില് ഇവിടെ കാണാം.
“Woman means Power. When this power combines with divine power it transforms into a power which is indefinable.Smt Divya Joshi, who is the pontiff of Sri Rudrath VishnuMaya temple mutt is a perfect example of this combined power.Smt.Divya Joshi has successfully attained the ‘divine attribute’ status which we popularly term as Siddhi in Malayalam language by her steadfast divine meditation over many years together with the virtues which is blessed and passed on to her by forefathers. By properly employing certain specific powers gained through chanting Vedic hymns which is made inaccessible to women by Vedic gurus, Divyaji is able to wipe out the tears of thousands of people. ”
ഇതൊന്നും ഞാന് പറയുന്നതല്ല. അല്ലെങ്കിലും ഇത്രയും നീളത്തില് ഇംഗ്ലീഷ് എഴുതാന് എനിക്കറിയാന് പാടില്ലെന്ന്ആര്ക്കാണ് അറിഞ്ഞു കൂടാത്തത്. ഇത് www.divyajoshy.com എന്ന വെബ് സൈറ്റില് വിവരമുള്ള ആളുകള് എഴുതി വച്ചിരിക്കുന്ന കാര്യമാണ്. ഇതുകൊണ്ടൊന്നും തീരുന്നില്ല. കള്ള സന്യാസിമാരുടെ കാലത്ത് ആരും അവിശ്വാസികളാവാതിരിക്കാന് വേറെയും ചില വെളിപ്പെടുത്തലുകളുണ്ട്.
“Divya Joshi’s rise as devotee of lord Vishnumaya was well predicted by great grand mother Chakki. Cheerambath family has a background of offering and conducting special prayers and rituals for Lord Vishnumaya.”
എന്നാല്, ദൈവത്തിന്റെ ഹസ്ബന്ഡ് ജോഷി കറ തീര്ന്ന ഗുണ്ടയായിരുന്നെന്നും അവിടെ നിന്നിരുന്ന പൂജാരിമാര്ക്ക് ഫ്രീ ടൈമില് കൂലിത്തല്ലായിരുന്നെന്നുമൊക്കെയാണ് ഇവിടെ ചില മാധ്യമങ്ങള് വരുത്തിത്തീര്ക്കാന് ശ്രമിക്കുന്നത്. കഷ്ടമുണ്ട് കേട്ടോ ! 
അല്ലെങ്കില് ഈ പൂജാരിയെ നോക്കിയിട്ട് നിങ്ങള് പറയൂ. അതുകൊണ്ടും തീരുന്നില്ല. സത്യക്രിസ്ത്യാനിയായിരുന്ന ജോഷി ദിവ്യയുടെ ഫാദറിന്റെ കൂടെ കൂടി പിന്നീട് ദിവ്യയെ വിവാഹം കഴിക്കുകയായിരുന്നെന്നും പിന്നെ, സമനില തെറ്റിയ ദിവ്യ കുറെക്കാലം ഭ്രാന്തിനു ചികില്സിച്ചിരുന്നെന്നും അതു കഴിഞ്ഞിറങ്ങി ദൈവമായി പ്രഖ്യാപിച്ച് ഇടപാടുകള് തുടങ്ങുകയായിരുന്നെന്നും അതിനിടെ ദിവ്യയുടെ ഫാദര് കത്തിക്കരിഞ്ഞു മരിച്ചു പോയെന്നും അതില് ഭീകരമായ ദുരൂഹതകളുണ്ടെന്നും അങ്ങനെ എന്തൊക്കെ കഥകള്. മാധ്യമങ്ങളോട് ദൈവം ചോദിക്കും.
