ചുവന്ന വെളിച്ചം (ഒരു സൈക്കോപ്പാത്തിന്റെ രാത്രികള്-3)
വലിയൊരു പിടിവള്ളി കിട്ടിയ സന്തോഷത്തോടെ അന്വേഷകന് മടങ്ങി. ഇനിയൊരു പക്ഷേ അന്തോണിയെ കാണേണ്ടി വരില്ല. അല്ലാതെ തന്നെ ചുവന്ന വെളിച്ചം കേസിലെ പ്രതികള് കുടുങ്ങിയേക്കും. ഇനി അധികം ആളുകളെ കാണേണ്ടതില്ലെന്നും അന്വേഷകനു തോന്നി. എങ്കിലും ഒരു വട്ടം കൂടിയൊന്ന് പൂര്ത്തിയാക്കുന്നത് നന്നായിരിക്കുമെന്നു തോന്നിയ അന്വേഷകന് നേരേ വികാരിയച്ചന്റെ അടുത്തേക്കാണു പോയത്.
ക്ലാര…അല്ലേ ? -അന്വേഷകന്റെ ചോദ്യത്തിനു മുന്നില് വികാരി ആലോചനയിലാണ്ടു.
അതെ..ഇപ്പോള് സിസ്റ്റര് മഗ്നീഷ്യാന
ഒ!ഒ!ഓ..! നമ്മുടെ മഗ്നീഷ്യാമ്മ..അമ്മയെ അറിയാത്തവരായി ആരെങ്കിലും ഈ കരയിലുണ്ടോ ?
അല്ല…അങ്ങിനെ പ്രശ്നക്കാരിയാണോ ?
അയ്യോ പ്രശ്നമല്ല..പ്രാര്ത്ഥനാ ജീവിതം, പ്രസാദവരം…അങ്ങനെ..
ക്ലാരയെ അച്ചനെത്ര കാലമായി അറിയാം ?
യ്യോ, അങ്ങനെയൊന്നുമില്ല..മഠത്തില് പോകുമ്പോള് കാണുമെന്നല്ലാതെ ഫേവറിറ്സില് ആഡ് ചെയ്തിട്ടൊന്നുമില്ല..
ഓഹോ ? അച്ചനോര്ക്കൂട്ടിലൊക്കെയുണ്ടല്ലേ ?
മിഷനറി പ്രവര്ത്തനത്തിനു തലങ്ങളില്ലല്ലോ..എനിക്കുമുണ്ടൊരു പ്രൊഫൈല്
ക്ലാരയുടെ പ്രൊഫൈല് വിസിറ്റ് ചെയ്തിട്ടുണ്ടോ ?
പുതിയ പ്രൊഫൈല് ഇടയ്ക്കിടെ, വികാരി എന്ന നിലയില്..
മനസ്സിലായി… ടെസ്റ്റി എഴുതിയിട്ടുണ്ടോ ?
ഇല്ല..
സ്ക്രാപ് ഇട്ടിട്ടുണ്ടോ ?
ഇങ്ങനെയൊക്കെ ചോദിച്ചാല് ഒന്നു രണ്ടു തവണ…
ക്ലാരയുടെ പഴയ പ്രൊഫൈല് അറിയാമോ ?
കുറച്ചൊക്കെ..
എങ്ങനെ അറിയാം ?
സുനീഷ് കെസിവൈഎമ്മിലുണ്ടായിരുന്ന സമയത്ത് അവന്റെ വീട്ടില് പോയപ്പോള് കണ്ടിട്ടുണ്ട്.
അതെങ്ങനെ ?
സുനീഷിന്റെ വീടിന്റെ തൊട്ടപ്പുറത്തൊരു ചെറിയ കുന്നില് മുകളിലാണ് ക്ലാരയുടെ വീട്. അവിടെ വീടിന്റെ ബാല്ക്കണിയില് ക്ലാര ഇറങ്ങി നില്ക്കുമായിരുന്നു.
സുനീഷിനെ കാണാന് ??
അയ്യോ, എനിക്കറിയില്ല..അവരുടെ കണ്ണുകള് തമ്മിലുടക്കുന്നത് എപ്പോഴെങ്കിലും കണ്ടിട്ടുണ്ടോ ?
ഇല്ല, ഇല്ല, ഇല്ല.
ജോര്ജുകുട്ടിയെ അഭിമുഖീകരിക്കുമ്പോള് അന്വേഷകന്റെ കണ്ണുകളില് ആത്മവിശ്വാസത്തിന്റെ തിളക്കമുണ്ടായിരുന്നു. ജോര്ജുകുട്ടിയുടെ കണ്ണുകളില് ഭീതിയുടേയും.
സുനീഷിനെ എത്രകാലമായി അറിയാം ?
ചെറുപ്പം മുതലേ അറിയാം..
ക്ലാരയെയോ ?
ക്ലാരയെയും..
അവര് തമ്മില് പ്രണയത്തിലായിരുന്നോ ?
ഏയ് അല്ല…അവനങ്ങിനെയൊന്നും ഉണ്ടായിരുന്നില്ല..
പിന്നെ ക്ലാരയ്ക്കുണ്ടായിരുന്നോ ?
എനിക്കറിയില്ല.. അവള് ഇടയ്ക്ക് അവനെ വളയ്ക്കാന് ശ്രമിച്ചിരുന്നു എന്നു കേട്ടിരുന്നു പിന്നെയത് കേട്ടില്ല.
എന്നിട്ടു സുനീഷ് വളഞ്ഞോ ?
വളഞ്ഞതായൊന്നും പറഞ്ഞില്ല.
അന്വേഷകന് പിന്നെയും മഠത്തിലേക്കു നടന്നു. ചാപ്പലില് മെഴുകുതിരി കത്തിക്കല് യജ്ഞത്തിലായിരുന്നു ക്ലാര എന്ന മഗ്നീഷ്യാമ്മ.
എന്താണിന്നു പ്രത്യേകത ?
ഒന്നുമില്ല..വേണ്ടപ്പെട്ട ആരോ എന്തോ തിരഞ്ഞലയുന്നു എന്നു മനസ്സ് പറയുന്നു..അതു കണ്ടെത്താന് വേണ്ടി ഒരു മെഴുകുതിരി പ്രാര്ത്ഥന…
സുനീഷുമായി എങ്ങനെയായിരുന്നു ?
അയലോക്കമായിരുന്നു..
ഗുഡ്..അവനെ ഇഷ്ടമായിരുന്നോ ക്ലാരയ്ക്ക് ?
എങ്ങനെ ? ഞാനുമൊരു പെണ്ണല്ലേ സാറേ ?
സുനീഷിനെന്തായിരുന്നു അത്രയ്ക്കൊരു പിശക് ?
ഒന്നുമില്ല..എല്ലാ ദിവസവും കള്ള് കുടിച്ചിട്ടു വന്ന് പപ്പേടെ കാറിന്റെ പുകക്കുഴലിനകത്തേക്ക് മൂത്രമൊഴിക്കുമായിരുന്നു. കാറിന്റെ ചില്ലിലെ പൊടിയില് ക്ലാര ഐ ലവ് യൂ എന്നെഴുതി വയ്ക്കുമായിരുന്നു..തെണ്ടി !
നോ,നോ ക്ലാര… നിങ്ങള് ഏറെക്കാലം സുനീഷിനെ വളയ്ക്കാന് ശ്രമിച്ചതായി ഞാന് കേട്ടു.
ആ വട്ടന് ജോര്ജ്കുട്ടിയല്ലേ പറഞ്ഞത് ?
എങ്ങനെ മനസ്സിലായി ?
അവനത് വേറെയും പലരോടും പറഞ്ഞതായി ഞാനറിഞ്ഞു.
അതില് സത്യമുണ്ടോ ?
ഒരു ശതമാനം പോലുമില്ല !
അല്ല.. അതില് സത്യമുണ്ട് ! -പിന്നില് നിന്ന് സാക്ഷാല് അന്തോണി പറഞ്ഞു.
ക്ലാര വിളറി.അന്തോണിയുടെ മുഖത്ത് ക്രൌര്യമുള്ള ഒരു ചിരിയുടെ അവശിഷ്ടം തളം കെട്ടി നിന്നു.എണ്പതുകളിലെ സിനിമകളിലെ കൊച്ചിന് ഹനീഫയെപ്പോലെ ചാപ്പലിന്റെ വിരിമാറിലൂടെ അന്തോണി സ്ലോ മോഷനില് നടന്നു. ക്ലാര ഭീതിയോടെ അന്വേഷകനെ നോക്കി. നീയൊരു കോപ്പും പേടിക്കേണ്ട എന്ന ഭാവത്തോടെ അന്വേഷകന് ബലം പിടിച്ചു നിന്നു.
സിസ്റ്റര് മഗ്നീഷ്യാമ്മ കള്ളം പറയുകയാണ് – അന്തോണിക്ക് വി.സാംബശിവന്റെ ശബ്ദമായിരുന്നു അപ്പോള്.
ക്ലാര ഒന്നും മിണ്ടിയില്ല.
അന്തോണി തുടര്ന്നു-
ക്ലാര സുനീഷിനെ വളയ്ക്കാന് ശ്രമിച്ചിരുന്നു എന്നു ഞാന് പറഞ്ഞാല് ?
കള്ളം പച്ചക്കളളം !- ക്ലാര ചൂടായി.
സത്യമാണ്…ജോര്ജുകുട്ടി എന്നു പറയുന്ന പോങ്ങന് എല്ലാം അറിയാം..എല്ലാക്കാര്യങ്ങളും അറിയാവുന്ന മൂന്നു പേരില് രണ്ടാമത്തെയാള് ആ ജോര്ജ്കുട്ടിയാണ് …
അപ്പോള് മൂന്നാമത്തെയാള് സുനീഷാണോ ???
അതെ !!!!ക്ലാര ഞെട്ടി, അന്വേഷകന് ഞെട്ടി. ഒരു പഞ്ചിന് അന്തോണിയും .
എല്ലാമറിയാവുന്നവര് ആരൊക്കെയാണെന്ന് എല്ലാവര്ക്കും മനസ്സിലായ നിലയ്ക്ക് സത്യങ്ങള് മാത്രമേ ഇനി പറയേണ്ടതുള്ളൂ…പറയൂ എന്താണാ സത്യം ?-അന്വേഷകന് ചോദിച്ചു.
എന്ത് സത്യം ?
ആ ചുവന്ന വെളിച്ചത്തിന്റെ സത്യം..അതറിയാന് ഈ ലോകം മുഴുവന് കാത്തിരിക്കുകയാണ്..പറയൂ..
ക്ലാരയെ നേരിയതായി വിറച്ചു തുടങ്ങി.
പറയാം !- അന്തോണി ക്ലാരയെ നോക്കിക്കൊണ്ട് പറഞ്ഞു.- ആ ചുവന്ന വെളിച്ചത്തിന്റെ ഉറവിടം…ആ ചുവന്ന വെളിച്ചത്തിന്റെ ഉറവിടം…
പറയൂ ആരായിരുന്നു ? സുനീഷ് ? ജോര്ജ്കുട്ടി ?
അല്ല, അല്ല..ആ ചുവന്ന വെളിച്ചത്തിന്റെ ഉറവിടം… ഈ നില്ക്കുന്ന ക്ലാരയായിരുന്നു !!!
പെട്ടെന്നു തൊട്ടപ്പുറത്തെ മുറിയില് നിന്ന് ഒരു ഗ്ലാസ് വീണു തകരുന്ന ശബ്ദം കേട്ടു, ആരോ ഒരാള് ധൃതിയില് ഓടുന്ന ശബ്ദവും.
